वेतन व भविष्य निर्वाह निधी कार्यालयातील अधिक्षका श्रीमती मीनाशी भाऊराव गिरी २ लाख रुपयाची लाच घेताना रंगेहात पकडली गेली. धुळे लाच लुचपत विभागाची कारवाई.

यावल दि.२० 

धुळे जिल्हा परिषद मधील माध्यमिक शिक्षणाधिकारी कार्यालयातील वेतन व भविष्य निर्वाह निधी कार्यालयातील अधिक्षका श्रीमती मीनाक्षी भाऊराव गिरी यांनी २ लाख रुपये रक्कम स्वतः स्वीकारताना धुळे लाचलुचपत प्रतिबंधक विभागाचे पोलीस उपाधीक्षक सचिन साळुंखे यांच्या पथकाने आज रंगेहात पकडले यामुळे संपूर्ण धुळे जळगाव जिल्ह्यात शैक्षणिक क्षेत्रात मोठी खळबळ उडाली.

            याबाबत सविस्तर माहिती अशी की तक्रारदार व त्यांची पत्नी ह्या महानगरपालिका हायस्कूल धुळे येथे विशेष शिक्षक या पदावर कार्यरत आहेत महाराष्ट्र शासनाच्या शालेय शिक्षण व क्रीडा विभागाच्या दि. ३० नोव्हेंबर २०२३ चे शासन निर्णयान्वये त्यांचे एप्रिल २०२२ ते आक्टोंबर २०२३ या कालावधीतील थकीत वेतन तसेच सातव्या वेतन आयोगाचा तिसरा व चौथा हप्ता मंजूर होऊन माननीय शिक्षण संचालक पुणे यांनी सदरचे थकीत वेतन अधीक्षक (माध्यमिक) वेतन व भविष्य निर्वाह निधी कार्यालय धुळे यांच्या खात्यात जमा केले होते. परंतु सदरचे थकीत वेतन तक्रारदार व त्यांच्या पत्नीस अदा न झाल्याने त्यांनी वेळोवेळी श्रीमती मीनाक्षी गिरी अधिक्षका माध्यमिक वेतन व भविष्य निर्वाह निधी कार्यालय धुळे यांची त्यांच्या कार्यालयात जाऊन भेट घेतली होती, परंतु त्यांनी ह्यां ना त्या कारणाने तक्रारदार व त्यांच्या पत्नीस त्यांचे थकीत वेतन अदा केले नाही त्यानंतर सुमारे १५ ते २० दिवसांपूर्वी तक्रारदार यांनी श्रीमती मीनाशी गिरी अधीक्षका यांची त्यांचे कार्यालयात जाऊन त्यांना सदरचे थकीत वेतन अदा करणे बाबत विनंती केली असता त्यांनी तक्रारदार यांच्याकडे २ लाख रुपये लाचेची मागणी केल्याची तक्रारदार यांनी लाच लुचपत प्रतिबंधक कार्यालय धुळे येथे आज दि.२० ऑगस्ट २०२४ रोजी समक्ष येऊन तक्रार दिली.

         सदर तक्रारीची आज रोजी पडताळणी केली असता पडताळणी दरम्यान अधीक्षका श्रीमती मीनाशी गिरी यांनी तक्रारदार यांच्याकडे दोन लाख रुपये लाचेची मागणी करून सदर लाचेची रक्कम स्वीकारण्याचे मान्य केल्याने आज रोजी त्यांच्यावर सापळा लावला असता सापळा कारवाई दरम्यान सदर लाचेची रक्कम कार्यालयात त्यांनी स्वतः स्वीकारताना त्यांना रंगेहात पकडण्यात आले असून त्यांचे विरुद्ध धुळे शहर पोलीस स्टेशन येथे भ्रष्टाचार प्रतिबंधक अधिनियमाच्या कलमान्वये गुन्हा दाखल करण्याची कार्यवाही सुरू झाली.

        सदरची कारवाई लाच लुचपत प्रतिबंधक धुळे विभागाचे पोलीस उपअधीक्षक सचिन साळुंखे यांचे मार्गदर्शनाखाली पोलीस निरीक्षक रूपाली खांडवी तसेच पथकातील राजन कदम, मुकेश अहिरे,प्रशांत बागुल,प्रवीण पाटील, प्रवीण मोरे,मकरंद पाटील,रामदास बारेला,सुधीर मोरे व जगदीश बडगुजर या पथकाने केली आहे.

       या कारवाईस नाशिक लाच लुचपत प्रतिबंधक विभाग नाशिक परिक्षेत्राचे पोलीस अधीक्षक शर्मिष्ठा वालावलकर , अपर पोलीस अधीक्षक माधव रेड्डी व वाचक पोलीस निरीक्षक स्वप्निल राजपूत यांचे मार्गदर्शनाखाली गुन्ह्याचा पुढील तपास सुरू आहे.